Сәкен Майғазиев: "Көлігімді сатпаймын, концертіме демеушілер табылды"

#Их жизнь

7-наурыз күні Алматы қаласында Республика сарайында Сәкен Майғазиев «Жүрегімнің ішіндегі жүрегім» атты өзінің алғашқы шығармашылық кешін өткізеді. Аталмыш кештің ерекшелігі мен дайындығы туралы әншінің өзі баяндады.

Мен үшін Сәкен емес, «Музарт» бірінші орында.

2015 жылы Астана қаласының әкімдігінің қолдауымен, Болат Мажағұлов мырзаның ұсынысымен аналар, әйелдер мерекесінің қарсаңында концерт өткізген болатын. Араға үш салып Алматы қаласында да есеп беретін уақыт келді-ау деп ойладық. «Жеке кешіңізді неге осыншама уақыт ұзақ күттірдіңіз?» деген сұрақты жиі естіп жүрмін. Себебі, мен үшін Сәкен емес, «Музарт» әрдайым бірінші орында. Топтағы бәріміз де көбінесе бірінші күшті «Музартқа» саламыз. Шығармашылық жағынан да, уақыт жағынан да Музартпен санасамыз. Тіпті, бұған дейін мен өз тарапымнан мұндай ұсынысты жігіттерге жасаған да емеспін, ойлаған да емеспін. «Сабақты ине – сәтімен» деген осы шығар!

Концертім 100% жанды дауыста болады.

Соншалықты өзгеше болып, мен тікұшақпен ұшып келемін деп айтпаймын. Бірақ, менің өнерімді бағалап, сыйлап келген көрермен жалығып, шаршап кетпейтіндей бір деммен өтсе деймін. Репертуарымда әндерім өте көп. Бәрін орындау, әрине, мүмкін емес. Отызға жуық ән орындалады. Арасында жаңа әндер, жаңа дуэттер болады. Өнерсүйер қауымның жүрегінен орын тапқан ескі әндерді де бәріміз бірге орындайтын боламыз деп ойлаймын. Кеш қонақтары: «Музарт», Зарина Алтынбаева, «SMart» мектебінің шәкірттері, т.б.сыйлы қонақтарым болады. Менің жаңа қырымды да көріп қалуларыңыз мүмкін. Ең бастысы, 100% жанды дауыста болады.

«Жүрегімнің ішіндегі жүрегім»

Кештің дәл бұлай аталуының өзіндік себебі бар. Кез-келген өнер адамының шығармашылығында жетістіктер мен құлдырау, тоқырау, кризис болады. Ал, Жарас Сәрсек ағамыздың сөзіне жазылған, Айгүл Бажанованың әні «Жүрегімнің ішіндегі жүрегім» сондай крезистен шығарған туынды болды. Ер азаматтың жүрегінің ішіне анасы, әйелі, әпкесі, ұл-қыздары, бауыры, барлық әулет, Отаны кіреді. Соның бәрін бір арнаға тоғыстырған керемет ән жеке кешімнің атауы болуға толық лайықты деп санадым.

Көлігімді сатпаймын, демеушілер табылды.

Көлік сату туралы әңгіме әзіл болатын. Жалпы, жеке кешімнің шығыны менің көлігімнің бағасымен тең екенін айтқан едім. Қазір «көлігімді сатпаймын, демеушілер табылды» деп әзілдеймін. Басты демеушілерім – халқым. Ал, қаржы жағынан азаматтық танытып жатқан жігіттер бар. Шынында, жақын-жұрағаттардың ең болмаса сөз жәрдеммен көмектесетін, танылатын, сыналатын кезі десем де болады. Бұл да бір үлкен жауапкершілікті талап ететін жұмыс. Жанымнан табылып, қолдау көрсетіп жүрген жандар бар, Аллаға шүкір. Бұрын ата-әжем: «өзің жақсы болсаң, айналаңның  бәрі жақсы болады» деп отыратын. Шүкір, айналама жақсылар жиналды. Ең бастысы халықтың қолдауы, сұранысы жоғары.

#музарт #концерт #Сәкен Майғазиев #Жүрегімнің ішіндегі жүрегім

Загрузка...